puls.is - skemmtiefni dagsins

Ég hef óvenjulegt áhugamál. Ég skoða heilsusíður mér til skemmtunar. Margir fara á þær til þess að fræðast og kynnast hinum heilaga sannleik vikunnar um heilsumál. Ég hlæ, mikið. Gott dæmi um síðu, sem er ekkert nema fyndin, er puls.is Þarna eru vörusvik eins og áruhreinsunarúði. Síðan er bækur eftir Hulda Clark sem er vel þekkt fyrir halda því fram að allar gerðir krabbameina er afleiðing af sýkingu af einni tegund af flatormi.

Síðan sá ég titil á bók sem heitir Flood Your Body With Oxygen eftir Ed McCabe. Það er stórkostlegt að einhver sé að selja þessa bók þegar líka er reynt að pranga inn á mann andoxunarefnum. Til hvers að nota andoxunarefni þegar maður er hvort sem er að fara nota mikið magn af sterkum oxara sem heitir óson ?

Síðan er verið að fá mann til þess að drekka silfur agnir en það veldur argyria þar sem húðin verður grá og þú getur fengið silfur í augun. . Síðan er fullt af einhverju rándýru tækjadrasli sem að vera svo gott fyrir mann. Þar á meðal 52þús króna tæki sem er hannað af einhverjum reikimeistari til þess að dæla í þig hinni ímynduðu alheimsorku.

En það virkilega skemmtilega kom þegar ég fór að leita upplýsingar um eigendurna, sem eru þau Lilja Petra Ásgeirsdóttir og Erlendur Magnús Magnússon. Ég komst til dæmis að því að þau eru margvíðir shamballa heilunarmeistarar. Margvíðir :D Meira af því bulli, fengið héðan
Þú munt fá 12+1 virkjanir inn á hin 12 plön raunveruleikans. Við munum einnig tengja við kosmískar og alheims ásýndir Shamballa og hinna uppljómuðu meistara og okkar sjálfra. Það mun verða virkjun á demöntum og kristöllum Melchizedeks. Vígsla inn í Melchizedek regluna. Virkjun á hinum helgu rúmfræðilegum formum og eldstöfum hinna fimm helgu tungumála í öllum líkömum þínum. Djúp hreinsun á ígræðslum og ýmsum tilvistum sem finnast í orkulíkömum þínum.

Svona bull á skilið að fá medalíu. En þá gæti maður verið að styðja við skottulækningar eins og þessi hjón stunda.

Aspartam og fjölmiðlar

Ég var að skoða Blaðið í dag, á bls. 10 er að finna frétt um aspartam. Það er áhugavert að höfuðviðmælandinn í fréttinni, hann Haraldur Magnússon er osteópati. Hvaða kjaftæði er í gangi ? Af hverju er verið að spyrja einhvern sem er í gervivísindum ?

Það er absúrd að sjá mann sem hafnar aðferðafræðum vísindanna tjá sig um álitamál í vísindum og sjá að honum er tekið sem sérfræðingi í málinu. Maður sér ekki fjölmiðla stökkva til og spyrja málfræðinga um lögfræðileg álitamál í Baugsmálinu og álit þeirra sett jafnhá álitum lögfræðinga. Þetta er meira að segja fræg rökvilla, appeal to authority. Það er líka sérstaklega skondið að sjá Harald tala um það að vegna þess að fyrirtæki fjármagni rannsóknirnar þá séu þær sjálfkrafa ónothæfar. Hvað ef að rannsakendurnir hafa fordóma ? T.d. hata svertinga og hanna tilraun til þess að sýna fram á það ? Það er ein af ástæðunum af hverju tvíblindar rannsóknir er notaðar í dag, þá getum við fjarlægt ómeðvitaða fordóma.

Hvað er að gerast fyrir Ísland ? Ef að kjaftæði tengist heilsu eða hollustu þá er það tekið sem heilagur sannleikur og dreift um allt og boðið í sjónvarpsþætti. Hvar er skynsemin ?

Kemur ekki á óvart

Þetta er einn þeirra hluta sem einkennir mikið af heilsuframleiðslu. Það er lélegt gæðaeftirlit þar sem í flestum löndum þá er þetta talið svo hollt að það þurfi ekki að fylgjast með þessu.

Sex lifrarbólgutilfelli eftir neyslu á Herbalife

Hættu að ljúga Andrea

Það er merkilegt hvað fólk leyfir sér þegar það hefur eitthvað fastákveðið markmið. Dæmi um þetta er bloggarinn Andrea en hún er eitthvað á móti gervisætunni aspartam. Þetta er eitt af mest rannsökuðu íbætiefnum í mat sem til er í heiminum. Það er áhyggjuefni að líklegur varaþingmaður VG er svona óheiðarlegur.

Ég geri mér fulla grein fyrir því að ég kem með alvarlegar ásakanir en þær eru réttar. Ég er hérna að tala um málflutning hennar um tilraun Soffritti, et al. þetta er áhugaverð tilraun sem var framkvæmd á 1800 rottum. Hún Andrea segir eftirfarandi um þessa tilraun:
hann gaf helmingi þeirra mismunandi stóra skammta af aspartame og hinn helmingurinn fékk ekki neitt. 62% af þeim rottum sem fengu aspartame greindust með (hvítblæði og) krabbamein en í hinum hópnum var engin rotta sem fékk krabbamein. Þar að auki voru nokkrar rottur sem fengu heilaæxli, en engin fékk það í viðmiðunarhópnum. Að mínu mati er mjög stór ástæða fyrir neytendur að spyrja sig spurninga þegar svo virðist sem um 90-100% óháðra rannsóknaraðila finna eitthvað að efninu, á meðan þeir sem studdir eru af stórfyrirtækjum sem nota sjálfir efnið eða hafa einhverra viðskiptahagsmuna að gæta segja það skaðlaust. Við það set ég í það minnsta mjög stórt spurningamerki.

Það er ósköp mikið af rangfærslum í þessari litlu málsgrein. En förum í gegnum þetta og berum saman við það sem stendur í fræðigreininni. Hún fullyrðir að það hafi verið tveir helmingaskiptir hópar, það er lygi, það voru 7 ólíkir hópar, þar af einn viðmiðunarhópur (hópur VII) sem innihélt 300 rottur. Hinir sex hóparnir fengu ólíkar skammtastærðir af aspartami í fæðunni sinni.

Andrea fullyrðir að engin af rottunum í viðmiðunarhópnum hafi fengið hvítblæði og/eða krabbamein. Kjaftæði, í þessum hópi fengu tæp 15% af rottunum krabbamein og/eða hvítblæði (lymphoma and leukemia). Það er hinsvegar rétt hjá henni Andreu að engin rotta í viðmiðunarhópnum hafi fengið heilaæxli, það gilti einnig um hóp V og bara ein í hóp III (sbr. skammtur fyrir 80kg manneskju væri 40grömm af aspartami á dag, sem eru tæpir 189 lítrar af sprite zero á dag). Það að álykta að það séu einhver tengsl þarna er bjánalegt þar sem að ef tengsl væru þarna á milli, ættu þau að tengjast skammtastærð en gögnin neita því að það fá færri rottur í hópi I (mest aspartame) heilaæxli heldur en í hópi VI (minnst aspartame).

Síðan er eitt annað sem Andrea virðist ekki hafa tekið eftir. Sú niðurstaða sem Soffritti og félagar fengu var ekki að aspartame væri krabbameinsvaldandi fyrir rottur heldur bara krabbameinsvaldandi fyrir kvenkyns rottur ekki karlkyns. Þetta er mjög áhugaverð tilraun en til hvers að ljúga um niðurstöður hennar ?

Síðan talar hún Andrea um myndina Sweet Misery sem er ekkert annað en samsuða af samsæriskenningum og rökvillum. Eftir að hafa séð myndina fór hún að leita sér að upplýsingum um aspartame, verst að meginhluti efnisins sem þú finnur af netinu um aspartam er kjaftæði. Hún viðurkennir þó að hún hafi farið af stað í fróðleiksleitina fordómafull gagnvart þessu blessaða dípeptíði. En ég prófaði að googl-a aspartame. Það voru 3 færslur á fyrstu síðunni sem voru ekki kjaftæði. Þetta er eitt af því sem einkennir andstæðinga þekkingar og vísinda, magnið ekki gæðin. 

Ath. Ég miðaði við 75mg af aspartame í 455mL af sprite zero skv. Wiki 

Viðbót mán 15.jan 02:22: Fann mjög áhugaverða skýrslu frá Evrópsku Matvælaöryggisstofnuninni um þessa tilraun. Þar er farið yfir ítölsku tilraunina og tekið fyrir atriði sem ekki voru nógu vel framkvæmd.

Hjörtun í Tsjernóbýl

Ég horfi á HBO heimildarmyndina Chernobyl Heart. Þetta var það átakanleg heimildarmynd að jafnvel steinhjarta mitt brast. Verst að þetta er ekkert nema áróðursmynd til styrktar einum samtökum. Sem betur fer hélt hugsunin velli í tilfinningaflóðinu sem kom við áhorf þessarar myndar.

Það var nefnilega fremur mikið af rangfærslum og útúrsnúningum í þessarri mynd. Ein villa sem ég tók eftir snemma var fullyrðingin að líkaminn ruglaðist á kalki og hinu geislavirka sesíum. Það er einfaldlega ekki rétt, sú samsæta sem líkaminn myndi ruglast fyrir kalki væri strontíum og líkaminn tekur inn sesíum þá er það venjulega í stað kalíum.

Á einum stað var fullyrt að 13þús af 600þús (sem áttu allir að hafa fengið risaskammt af geislun) liquidators sem stunduð hjálparstarf á svæðinu væru dauðir. Þetta er byggt á tölum frá Chernobyl Forum sem áætlar að 5% af þessum 0.4% gæti verið tengt geislun. Þrátt fyrir að það sé mikill fjöld mannslífa, þá er það ekki þessi dökka dökka mynd sem dregin er upp af framleiðundum myndarinnar.

Síðan var gert ráð fyrir að öll geislun sé slæm. Þetta er hið svokallaða linear no-threshold model þar sem gert er ráð fyrir að öll geislun sé slæm. Það hefur ekki ennþá verið klárað að komast að því hvort að svo sé raunin, það eru meira að segja gögn sem benda til þess að viss geislun geti verið góð því þá séu hin og þessi viðgerðarkerfi virkari í líkamanum og þá eigi krabbamein erfiðara með að komast af stað.

Ungbarnadauði í Hvíta-Rússlandi er þrefaldur miðað við V-Evrópu skv. myndinni. Þetta er sett fram eins og það sé geisluninni að kenna. Verst að þannig gleymist að benda á það að heilbrigðiskerfið er í molum svo það kemur mér meira að segja á óvart að hann sé bara þrefalt meiri en í V-Evrópu, þeas því landssvæði sem hefur gott heilbrigðiskerfi fyrir alla.

Síðan eru fæðingargallarnir sem hafa víst aukist um 250%, þar sem að önnur svæði sem hafa ekki orðið fyrir geislamengun hafa sýnt sömu fjölgun í fæðingargöllum þá er þetta bara aukning í bókhaldinu, en ekki raunaukning. Því núna er náttúrulega ekki þrýstingur frá sovéskum yfirvöldum um að allt eigi að vera fullkomið.

Síðan er náttúrulega hjartagallinn sem myndin er víst skírð eftir, þegar leitað er eftir heimildum frá hlutlausum aðilum um tilvist hans og tengsl við geislunina á svæðinu þá finnst ekkert.

Þessi heimildamynd gerir engum gagn. Það að fara og bera hálfsannleika og lyga um heimsbyggðina er ekki gott. Þetta er nógu slæmt mál án þess að þurfa að ýkja. Ef þið viljið sjá hlutlausari heimildamynd um kjarnorkumál, þá er Nuclear Nightmares í Horizon seríu BBC mjög góð.